Kahin Main Kam Hun Abhi Tak Kahin Siwa Hun Main

Syed Sarosh Asif

kahin main kam huun abhi tak kahin siva huun main

main ban chuka huun ya ab tak nahin bana huun main

ye aur baat ki ham ne pata laga hi liya

kabhi ḳhuda ne bataya nahin ḳhuda huun main

main intizar men baiTha huun apne hone ke

kabhi jo pesh na aaya vo hadisa huun main

kivaḌ khol ke puchha to kuchh nahin boli

kivaḌ band kiye to kaha hava huun main

mujhe manane ki koshish to kar rahe ho tum

tumhen ḳhabar bhi hai kis baat par ḳhafa huun main

pata nahin ki ḳhuda kyon mujhe na sun paaya

falak se lauT ke aati hui dua huun main