Hakeem Manzoor
chhoḌ kar mujh ko kahin phir us ne kuchh socha na ho
main zara dekhun vo agle moḌ par Thahra na ho
main bhi ik patthar liye tha buz-dilon ki bhiiḌ men
aur ab ye Dar hai us ne mujh ko pahchana na ho
ham kisi bahrupiye ko jaan len mushkil nahin
us ko kya pahchaniye jis ka koi chehra na ho
us ko alfaz-o-ma.ani ka tasadum kha gaya
ab vo yuun chup hai ki jaise muddaton bola na ho
dandnata yuun phire hai shahr ki saḌkon pe vo
jaise puure shahr men koi bhi a.ina na ho
log kahte hain abhi tak hai vo sargarm-e-safar
mujh ko andesha kahin vo raah men soya na ho
mujh ko ai ‘manzur’ yuun mahsus hota hai kabhi
jaise sab apne hon jaise koi bhi apna na ho
Leave a Reply