hasin khvab na de ab yaqin-e-sada de
mire vajud ko ya rab naya labada de
gham-e-hayat ko phaila de asmanon tak
dil-e-tabah ko vusat bhi kuchh ziyada de
mujhe qarar na de tu pas-e-ghubar-e-nafas
main shah-savar huun maidan bhi kushada de
na chhin mujh se mira zauq-e-khud-navardi bhi
mire qadam ko bhi manzil na de irada de
mire rafiqon ko de hausla ki sang uthaen
mire khulus ko har sang-e-sad-ifada de
mire harifon ke dam-kham men ho kami to unhen
mire ghurur se taufiq-e-istifada de
chamak de chand ko thandak hava ko dil ko umang
udaas qisse ko phir ek shahzada de
ki meri zaat bhi jis men dhuan dhuan ho jaae
kabhi kabhi mujhe vo sajda be-irada de
utaar de miri rag rag men phir se sabz lahu
sukut-e-dasht ko phir shorish-e-iada de
Leave a Reply