Humne Jis Ke Liye Phulon Ke Jahan chhoDe Hain

ham ne jis ke liye phūloñ ke jahāñ chhoḌe haiñ

us ne is dil meñ faqat zaḳhm-e-nihāñ chhoḌe haiñ

ham ne ḳhud apne usūloñ kī hifāzat ke liye

daulateñ chhoḌ diiñ shohrat kī jahāñ chhoḌe haiñ

zindagī ham ne tirā saath nibhāne ke liye

tapte sahrā meñ bhī qadmoñ ke nishāñ chhoḌe haiñ

ham kisī aur ke ho jaa.eñ kisī ko chāheñ

aise asbāb magar us ne kahāñ chhoḌe haiñ

jis kī parchhā.ī liye phirtī haiñ āñkheñ merī

us ne palkoñ pe mirī āb-e-ravāñ chhoḌe haiñ

Leave a Comment