Meena Khan
ham ne jis ke liye phulon ke jahan chhoḌe hain
us ne is dil men faqat zaḳhm-e-nihan chhoḌe hain
ham ne ḳhud apne usulon ki hifazat ke liye
daulaten chhoḌ diin shohrat ki jahan chhoḌe hain
zindagi ham ne tira saath nibhane ke liye
tapte sahra men bhi qadmon ke nishan chhoḌe hain
ham kisi aur ke ho jaa.en kisi ko chahen
aise asbab magar us ne kahan chhoḌe hain
jis ki parchha.i liye phirti hain ankhen meri
us ne palkon pe miri ab-e-ravan chhoḌe hain
Leave a Reply