rat-din josh-e-junun se kaam hona chahiye
ishq ki duniya men apna naam hona chahiye
miT na jaa.e is jahan se ishq ka nam-o-nishan
kuchh to pas-e-hasrat-e-nakam hona chahiye
gul-ruḳhon ki baat chhoḌo vo ḳhizan-dida hain phuul
fasl-e-gul ka zikr sub.h-o-sham hona chahiye
zindagi miTti hai miT jaa.e ada-e-farz men
farz ki takmil par anjam hona chahiye
chal diye sab dost aur ahbab tanha chhoḌ kar
ab to majburan ghariq-e-jam hona chahiye
charagar se ho nahin sakta gharibi ka ilaaj
ab gharibon hi ka qatl-e-am hona chahiye
ye bhi hai koi hukumat jis ki laThi us ki bhains
jante ho is ka jo anjam hona chahiye
azm-o-himmat ho to ban jaata hai ‘azam’ har koi
shart ye hai aadmi ḳhush-kam hona chahiye
Leave a Reply