Anwar Anjum
jahan-bhar se na yuun mera tazkira kiije
main dil ka raaz huun dil se mira gila kiije
ye kya yaqin ki samajh lega har ishara vo
labon ka farz nigahon se kyuun ada kiije
nasib men jo kabhi sub.h ka ujala ho
to mil hi ja.ega har raat kya dua kiije
ḳhulus ko bhi yahan maslahat kahenge log
bhala yahi hai kisi se na jo bhala kiije
dar-e-havas pe hai har-lahza ik na.i dastak
jo ḳhud se chhupte na phirye to aur kya kiije
ye ji men hai ki tira but tarash kar barson
tire huzur khaḌe arz-e-mudda.a kiije
tumhare haal se ham be-ḳhabar nahin ‘anjum’
par ab batao ki kya ranj ke siva kiije
Leave a Reply