Nisar Nasik
mujh ko be-ḳhvabi ki Tahni par sisakte dekhta rahta hai vo
apni hi be-dardiyon ko yuun mahakte dekhta rahta hai vo
surat-e-mahtab rahta hai mire sar par safar ke saath saath
mujh ko sahra ki udasi men bhaTakte rahta hai vo
peḌ ki surat khaḌa rahta hai meri mauj ki sarhad ke paas
mere sar par dhuup ke neze chamakte dekhta rahta hai vo
raat thak kar aan girta hai mire jalte badan ki aanch par
apne aansu mere galon par Dhalakte dekhta rahta hai vo
main vo bosida sa pairahan huun jo pahna gaya tha ek baar
mujh ko mahrumi ki khunTi par laTakte dekhta rahta hai vo
meri hi majburiyon ke zikr se ‘nasik’ rulata hai mujhe
samne apne na.e jugnu damakte dekhta rahta hai vo
Leave a Reply