Tujh Pe Jaan Dene Ko Tayyar Koi to Hoga

Shahzad Ahmad

tujh pe jaan dene ko tayyar koi to hoga

zindagi tera talabgar koi to hoga

taḳhta-e-dar pe chahe jise laTka diije

itne logon men gunahgar koi to hoga

koi divana to lalkarega aati rut ko

vaqi.a phir sar-e-bazar koi to hoga

koi to raat ko dekhega javan hote hue

is bhare shahr men bedar koi to hoga

dil ke andar bhi to maujud hai duniya ka zamir

aap se bar-sar-e-paikar koi to hoga

shaam ko roz nahata hai lahu men suraj

nahin khulta magar asrar koi to hoga

main yahi soch ke jangal se nikal aaya tha

shahr men saya-e-divar koi to hoga

ḳhushk miTTi se bhi ḳhushbu tiri aati hogi

miT chuka ghar magar asar koi to hoga

kyuun khinche jaate hain roz us ki taraf ham ‘shahzad’

us ki janib se bhi israr koi to hoga