ruḳh-e-hayat hai sharminda-e-jamal bahut
jami hui hai abhi gard-e-mah-o-sal bahut
gurez-pa hai jo mujh se tira visal to kya
mira junun bhi hai amada-e-zaval bahut
mujhe har aan ye deta hai vasl ki lazzat
vafa-shanas hai tujh se tira ḳhayal bahut
kitab-e-zist ke har ik varaq pe raushan hain
ye teri farda-nigahi ke ḳhad-o-ḳhal bahut
palaT ga.e jo parinde to phir gila kya hai
har ek shaḳh-e-shajar par bichhe hain jaal bahut
tumhen hai naaz agar apne husn-e-sarkash par
to mera ishq bhi hai ru-kash-e-jamal bahut
azan-e-sub.h ki har lai ki taar TuuT ga.e
farogh-e-zulmat-e-shab ka hai ye kamal bahut
kisi bhi pyaas ke maare ki pyaas bujh na saki
samundaron men to aate rahe uchhal bahut
Leave a Reply