Anjum Saleemi
bas ek jism ek hi qad men paḌa rahun
behad huun main to kyuun kisi had men paḌa rahun
sub.h-e-azal hai kab se mire intizar men
ji chahta hai taq-e-abad men paḌa rahun
ik roz tang aa ke mujhe sochna paḌa
kab tak main apni sohbat-e-bad men paḌa rahun
aage nikalta jaata huun main apne-ap se
ab dar-guzar karun ki hasad men paḌa rahun
be-sud ho gaya huun to hasil kahan gaya
ai asal zar main kaun si mad men paḌa rahun
Leave a Reply