Main Hun Wahshat Mein Gum Main Teri Duniya Mein Nahin Rahta

Zaheer Kashmiri

main huun vahshat men gum main teri duniya men nahin rahta

bagula raqs men rahta hai sahra men nahin rahta

baḌi muddat se tera husn dal bin kar dhaḌakta hai

baḌi muddat se dil teri tamanna men nahin rahta

ye paani hai magar mizhgan ki shaḳhon par sulagta hai

ye moti hai magar daman-e-dariya men nahin rahta

vo jalva jo sukut-e-bazm-e-yakta.i men rahta hai

vo jalva shorish-e-pinhan-o-paida men nahin rahta

na koi mauj-e-ra.ana.i na koi sail-e-zeba.i

koi tufan bhi ab chashm-e-tamasha men nahin rahta

ajab kya la-makan ko ik naya zindan samajh baiThe

ye divana had-e-imroz-o-farda men nahin rahta

‘zahir’ ik rishta-e-vahshat liye phirta hai majnun ko

vagarna koi apne aap sahra men nahin rahta