pyaar ki har ik rasm ki jo matruk thi main ne jaari ki
ishq-labada tan par pahna aur mohabbat taari ki
main ab shahr-e-ishq men kuchh qanun banane vaala huun
ab us us ki ḳhair nahin hai jis jis ne ghaddari ki
pahle thoḌi bahut mohabbat ki ki kaisi hoti hai
par jab asli chehra dekha main ne to phir saari ki
jo bhi muḌ kar dekhega vo patthar ka ho ja.ega
dekho dekho shahar men aa.e sannaTa aur tariki
ek janm men main us ka tha ek janm men vo mera
ham ne ki har baar mohabbat lekin baari baari ki
ham sa ho to samne aa.e aadil aur insaf-pasand
dushman ko bhi ḳhuun rulaya yaron se bhi yaari ki
aisa pyaar tha ham donon men ki barson la-ilm rahe
us ne bhi kirdar nibhaya main ne bhi fankari ki
baat to itni si hai vapas jaane ko main aaya tha
saans uTha.i umr sameTi chalne ki tayyari ki
Leave a Reply