Himayat Ali Shayar
manzil ke ḳhvab dekhte hain paanv kaaT ke
kya sada-dil ye log hain ghar ke na ghaaT ke
ab apne ansuon men hain Duube hue tamam
aa.e the apne ḳhuun ka dariya jo paaT ke
shahr-e-vafa men haqq-e-namak yuun ada hua
mahfil men hain lage hue paivand TaaT ke
khinchti thi jin ke ḳhauf se sadd-e-sikandari
so.e nahin hain aaj vo divar chaaT ke
ab to darindagi ki naash bhi husn hai
divar par sajate hain sar kaaT kaaT ke
Leave a Reply