tira niyaz-mand huun niyaz ke baghair bhi
dalil ke baghair bhi javaz ke baghair bhi
misal kya ki sar-ba-sar tira vajud sha.eri
kalam ke baghair bhi bayaz ke baghair bhi
tiri talab ka fasla ḳhalish ne tai kara diya
suluk ke baghair bhi lihaz ke baghair bhi
guzar rahi thi zindagi guzar rahi hai zindagi
nasheb ke baghair bhi faraz ke baghair bhi
tiri nigah-e-ḳhud-nigar dilon ko maat kar ga.i
laḌa.i ke baghair bhi mahaz ke baghair bhi
rava hai ishq men rava magar ye sajda-e-vafa
azaan ke baghair bhi namaz ke baghair bhi
Leave a Reply