meri ankhon ko miri shakl dikha de koi
kaash mujh ko mira ehsas dila de koi
gharaz is se nahin vo kaun hai kis bhes men hai
main kahan par huun mujhe mera pata de koi
DhunDhta phirta huun yuun apne hi qadmon ke nishan
jaise mujh ko miri nazron se chhupa de koi
dil ki taḳhti sar-e-bazar liye phirta huun
kaash is par tiri tasvir bana de koi
yuun tujhe dekh ke chaunk uThti hain soi yaden
jaise sannaTe men avaz laga de koi
dusri samt hain ḳhushbu ke ufuq ki sub.hen
rang ke kohar ki divar gira de koi
saans roke hue baiThe hain makanon men makin
jaane kab aur kise aa ke sada de koi
Leave a Reply