vo rabte bhi anokhe jo duriyan barten
vo qurbaten bhi nirali jo lams ko tarsen
saval ban ke sulagte hain raat bhar taare
kahan hai niind hamari vo bas yahi puchhen
bulata rahta hai jangal hamen bahanon se
sunen jo us ki to shayad na phir kabhi lauTen
phisalti jaati hai hathon se ret lamhon ki
kahan hai bas men hamare ki ham use roken
haqiqaton ka badalna to ḳhvab hai ‘fikri’
magar ye ḳhvab hai aisa ki sab jise dekhen
Leave a Reply