raat jab zaḳhm ke a.ine se Takrati hai
lau charaghon ki shafaq ban ke bikhar jaati hai
ghar ka angan ho ki sahraon ka sannaTa ho
koi avaz ta.aqub men chali aati hai
kitna hassas hai ye alam-e-tanha.i bhi
phuul khilte hain to zaḳhmon se mahak aati hai
har na.i sub.h tiri yaad ka aansu ban kar
zindagi shaam ki palkon se Tapak jaati hai
aag lagti hai ḳhayalon ke ufuq-zaron men
raushni mom ki manind pighal jaati hai
dil ki galiyon se guzarta hai zamana koi
fikr-e-sha.ir men koi raat mahak jaati hai
sochte chehron pe sadiyon ki thakan hai ‘saqib’
jagti ankhon men ab niind kahan aati hai
Leave a Reply