Tariq Naeem
miri nigah kisi zaviye pe Thahre bhi
main dekh sakta huun hadd-e-nazar se aage bhi
ye rasta mire apne nishan se aaya hai
mire hi naqsh-e-kaf-e-pa the mujh se pahle bhi
main us ki aankh ke manzar men aa to sakta huun
vo kam-nigah mujhe hashiye men rakkhe bhi
main us ke husn ki thoḌi si dhuup le aaya
vo aftab to Dhalne laga tha vaise bhi
mire kahe pe mujhe chaak par to rakhta hai
magar ye chaak se kahta nahin ki ghume bhi
abhi to mansab-e-hasti se main haTa hi nahin
badal ga.e hain mire doston ke lahje bhi
main ek shisha-e-sada huun aur mayassar huun
kisi ki aankh mire ar-par dekhe bhi
Leave a Reply