Midhat Ul Akhtar
main to apne aap ko pahchanna hi chahta huun
janta jo kuchh nahin vo janna hi chahta huun
sau farishte le ke mere paas aa.en jo sahifa
us ko apni chhalniyon men channa hi chahta huun
saikaḌon suraj khaḌe hain a.ina dar dast lekin
sar pe zulmat ki rida main tanna hi chahta huun
jo mire maujud men hai aur la-maujud men
jaan sakta hi nahin aur janna hi chahta huun
main jo dushman ke bulave par nikal aaya huun ‘mid.hat’
bar-sar-e-maidan men kuchh Thanna hi chahta huun
Leave a Reply