Makhdoom Mohiuddin
tum gulistan se ga.e ho to gulistan chup hai
shaḳh-e-gul khoi hui murgh-e-ḳhush-ilhan chup hai
ufuq-e-dil pe dikha.i nahin deti hai dhanak
gham-zada mausam-e-gul abr-e-baharan chup hai
alam-e-tishnagi-e-bada-gusaran mat puchh
mai-kada duur hai mina-e-zar-e-afshan chup hai
aur aage na baḌha qissa-e-dil qissa-e-gham
dhaḌkanen chup hain sarishk-e-sar-e-mizhgan chup hai
shahr men ek qayamat thi qayamat na rahi
hashr ḳhamosh hua fitna-e-dauran chup hai
na kisi aah ki avaz na zanjir ka shor
aaj kya ho gaya zindan men ki zindan chup hai
Leave a Reply