Jo Mehndi Ka Butna Mala Kijiyega

jo mehndi ka butna mala kijiyega

pasine ko itr-e-hina kijiyega

sitam kijiyega jafa kijiyega

yahi hoga aur aap kya kijiyega

phadak kar nikal jaega dam hamara

qafas se jo ham ko riha kijiyega

jo kahta huun achchha nahin zulm karna

to kahte hain vo aap kya kijiyega

qayamat men didar ka kab yaqin hai

yunhi lan-tarani suna kijiyega

kaha hal-e-dil to vo ye kah ke utthe

main jaata huun baithe baka kijiyega

shahanshah kahte hain un ke gada se

hamare liye bhi dua kijiyega

gulon ka vahi pairahan hoga sahab

inayat jo apni qaba kijiyega

kinara bhala tum se ai bahr-e-khubi

Dubone hi ko ashna kijiyega

munajjim ne haath un ke dekhe to bola

gulon ki qaba ko qaba kijiyega

miri jaan ke muddai aap honge

samaat agar muddaa kijiyega

bahut naz-parvarda hai dil hamara

zara lutf is par kiya kijiyega

na divana bante jo maalum hota

pari ban ke ham se uda kijiyega

buto barq hain dard-mandon ki aahen

khuda ke ghazab se Dara kijiyega

bahut faiz bakhshi ka sunte hain shohra

hamari bhi hajat rava kijiyega

khuda ke liye mirza-‘mehr’-sahab

buton par kahan tak mita kijiyega

Leave a Comment