Arshad Jamal Sarim
do-char sitare hi miri aankh men dhar ja
kuchh der to ai sa.at-e-shab mujh men Thahar ja
ab aur sambhali nahin jaati tiri hurmat
yuun kar gham-e-janan meri nazron se utar ja
ta-umr tira naqsh-e-farozan rahe mujh men
ik zaḳhm ki surat mire mathe pe ubhar ja
chhoḌ aana vahin par zara avara-mizaji
sahra ki taraf ai dil-e-nadan agar ja
ya ho ja tu dariya ki nigahon men tarazu
ya tishna-labi saath liye jaan se guzar ja
jab zehn ko sunni hi nahin baat tumhari
dil tu bhi rusumat-e-tahum se mukar ja
Leave a Reply