jis dam ye suna hai subh-e-vatan mahbus faza-e-zindan men
jaise ki saba ai ham-qafso betab ham aae zindan men
ho tegh-e-asar zanjir-e-qadam phir bhi hain naqib-e-manzil ham
zakhmon se charagh-e-rahguzar baithe hain jalae zindan men
sad-chak qaba-e-amn-o-sukun uryan hai ahinsai ka junun
kuchh khuun se shahidon ne apne vo gul hain khilae zindan men
ye jabr-e-siyasat ye insan mazlum aahen majbur fughan
zakhmon ki mahak daghon ka dhuan mat puchh faza-e-zindan men
ghairon ki khalish apnon ki lagan soz-e-gham-e-janan dard-e-vatan
kya kahiye ki ham hain kis kis ko siine se lagae zindan men
gul banti hai shayad khak-e-vatan shayad ki safar karti hai khizan
khushbu-e-baharan milti hai kuchh din se hava-e-zindan men
mujrim the jo ham so qaid hue sayyad magar ab ye to bata
har vaqt ye kis ko dhundte hain divar ke saae zindan men
jismon pe ye kis ka nam-e-siyah likh dete hain kodon ke nishan
hain taak men kis ki zanjiren ab aankh lagae zindan men
raftar-e-zamana lai jin ki gaati hai gul-e-naghma jin ka
ham gaate hain un avazon se avaz milae zindan men
Leave a Reply