jab se mere dil men aa kar ishq ka thana hua
hosh-o-sabr-o-aql-o-din kya sab se begana hua
dil hamara khana-e-allah gar mashhur tha
so buton ke ishq men ab ye bhi but-khana hua
qissa-e-farhad-o-majnun raat din padhte the ham
so to vo maazi pada ab apna afsana hua
raat din ye soch rahta hai mire dal ke taiin
ai khuda yaan se vo ja kar kis ka ham khana hua
kya haqiqat puchhta hai meri tanhai ki tu
jab ki mere paas se pyare tira jaana hua
bhuuk pyaas aur niind sab jaati rahi ai jan-e-man
balki in logon men main mashhur divana hua
shaikh ji aaya na vaade par to ab ‘asif’ ka yaar
tum to khush hoge tumhara hi jo farmana hua