shauq-e-dil-e-varafta ka ik said-e-zabun huun!
khulta hi nahin bhed ki main kaun huun kyuun huun
bas men hai kahan ahl-e-ḳhirad ke mujhe samjhen
jo aankh se ojhal hai main vo aks-e-darun huun
ḳhaliq huun baharon ka sar-e-gulshan-e-hasti
jo phuul khilata hai vo ik mauja-e-ḳhun huun
main dast-e-zamana ke miTa.e na miTunga
ik naqsh-e-vafa huun ki sar-e-lauh-e-junun huun
sahba-e-haqiqat ka huun sarmast azal se
ik banda-e-azad-e-tilismat-o-fusun huun
de mujh ko dua teri talabgar hai duniya
tu jo mujhe samjha hai main kuchh us se fuzun huun
‘nasir’ mujhe ulfat hai kisi se to ḳhata kyaa?
main halqa-e-arbab-e-havas se to barun huun
Leave a Reply