Adeel Zaidi
ham ne thama yaqin ko guman chhod kar
ik taraf ho gae darmiyan chhod kar
dil na maana jien kahkashan chhod kar
ja ke baste kahan khandan chhod kar
apna ghar chhod kar bastiyan chhod kar
be-aman ho gae ham amaan chhod kar
so gae beach men dastan chhod kar
ham alag ho gae karvan chhod kar
kaise nadan the ham sab kahan aa gae
apne abao-jad ke makan chhod kar
saath chalte rahe ye na socha kabhi
kaun jaega kis ko kahan chhod kar
aaj bhi muntazir ham vahin hain tire
kal gaya tha hamen to jahan chhod kar
raah apni nikali to manzil mili
ham chale jada-e-rahbaran chhod kar
hai ye maalum gar jism-o-jan se gae
sab chale jaenge mehrban chhod kar
gar tumhari tamanna hai daaim raho
jaao zehnon men raushan nishan chhod kar
tum to tanha hue jite-ji hi ‘adil’
log jaate hain tanha jahan chhod kar
Leave a Reply