Nigah-O-Dil Se Guzri Dastan Tak Baat Ja Pahunchi

Anwar Sabri

nigah-o-dil se guzri dastan tak baat ja pahunchi

mire honTon se nikli aur kahan tak baat ja pahunchi

bahe aansu zamin par asman tak baat ja pahunchi

kahi zarron se lekin kahkashan tak baat ja pahunchi

abhi hai iḳhtilaf-e-jam-o-mina raaz ki had tak

na-jane kya ho gar pir-o-mughan tak baat ja pahunchi

raqibon ne yunhi da.ava kiya tha jan-nisari ka

magar meri badaulat imtihan tak baat ja pahunchi

samajhte the rahegi zindagi mahdud-e-gul-bulbul

magar taḳhrib-e-nazm-e-gulistan tak baat ja pahunchi

chhiḌa tha bazm men kal tazkira mizhgan-o-abru ka

baḌhi kuchh is qadar tegh-o-sinan tak baat ja pahunchi

ma.al-e-jurm-e-taqsim-e-vatan kya kam tha rone ko

ki ab fikr-o-malal-e-ashiyan tak baat ja pahunchi

chhupa rakha tha jis ko muddaton se dil men ai ‘anvar’

hazar afsos vo sharh-o-bayan tak baat ja pahunchi