Khalid Shirazi
kahti hui ye mujh se hava-e-sahar ga.i
dasht-e-talab men shabnam-e-ehsas mar ga.i
rakkha na tha qadam abhi dasht-e-sukut men
avaz meri apne hi saa.e se Dar ga.i
main us ka nauha ban ke andhere men ghul gaya
vo ik kiran jo mere liye dar-ba-dar ga.i
main likh raha tha phuul ki patti pe tera naam
kanTe ki nok sina-e-gul men utar ga.i
mahfil men raat nit-na.e chehron ke shor men
vo kaun tha ki jis se lipaTne nazar ga.i
jis se thi abru-e-talatum vo mauj bhi
‘ḳhalid’ kanar-e-ḳhak pe sar rakh ke mar ga.i
Leave a Reply