abhi mira aftab ufuq ki hudud se ashna nahin hai
miri bhi shab ki sahar hai lekin numud se ashna nahin hai
khule kisi ke shu.ur par to mujhe bhi us ka suragh de de
ki mera jauhar hunuz apne vajud se ashna nahin hai
ghazab hai fitrat ka dasht-o-kohsar men nava-e-sukut bharna
magar vo kya sun sakega jo is surud se ashna nahin hai
main kis guman par kahun zamane men mera aghaz ho chuka hai
ki mera lamha abhi tak apne varud se ashna nahin hai
ḳhabar nahin karobar-e-ulfat men ja rahi hai kidhar tabi.at
ziyan se rakhti nahin ta.aruf ki suud se ashna nahin hai
dila raha huun main us ko ehsas us ki pahli rafaqaton ka
jo aaj ‘iqbal’ meri bud-o-nabud se ashna nahin hai
Leave a Reply