roz-o-shab aur na.e arz-o-sama mange hai
aaj ka daur na.i ab-o-hava mange hai
apni bechargi ki yuun to hai ehsas bahut
phir bhi dil tujh se vahi ahd-e-vafa mange hai
dhuup men jhulsi hui shaḳh pe afsurda kali
phuul banne ke liye dast-e-saba mange hai
har koi yuun to hai bar-gashta-e-halat magar
har koi jiine ki har lahza dua mange hai
aah vo valid-e-be-zar ki javan beTi ke
suune hathon ke liye rang-e-hina mange hai
ye na.e taur ye andaz mujhe raas nahin
meri tahzib vahi sharm-o-haya mange hai
sainkaḌon ne.amaton se us ne navaza hai tujhe
aur ab ‘chand’ tu allah se kya mange hai
Leave a Reply