ḳhamoshiyon men sada se likha hua ik naam
suno hai dast-e-dua se likha hua ik naam
har ik ki apni zaban hai na paḌh sakega bashar
zamin pe ab-o-hava se likha hua ik naam
jo sun sako to suno ḳhushbuon ke lab par hai
gulon pe bad-e-saba se likha hua ik naam
chamakta rahta hai jab tak kuredi jaa.e na raakh
chita pe dast-e-fana se likha hua ik naam
ajiib baat hai paḌhiye to harf uḌne lagen
badan badan pe qaba se likha hua ik naam
kabhi kabhi to baraste hue bhi dekha hai
falak pe kaali ghaTa se likha hua ik naam
magar ye quvvat-e-bina.i kis tarah aa.i
hava men dekha hava se likha hua ik naam
kabhi khulengi agar muTThiyan to dekhenge
hatheliyon pe hina se likha hua ik naam
ye ka.enat to lagta hai ‘nur’ jaise ho
kisi ki ḳhaas ada se likha hua ik naam
Leave a Reply