Ea C A Faf
tamam duniya men DhunD aaya main gum-shuda zindagi ki surat
mili to mujh ko hayat-e-muztar magar mili ajnabi ki surat
sabaq hai sikha ham ahl-e-dil ne ye ijz ki sar-bulandiyon se
ki ek sajda hai kaafi lekin ho bandagi bandagi ki surat
ajiib dastur-e-ashiqi hai na main hi main huun na tum hi tum ho
na dosti dosti ki surat na dushmani dushmani ki surat
ḳhabar tasavvur ḳhayal iman guman yaqin fikr ilm hikmat
maqam-e-ḳhud-agahi ke aage savad-e-kam-agahi ki surat
barahna-sar abla-gazida shikasta-dil pairahan-darida
maqam-e-sidra pe soch men huun koi hai parda-dari ki surat
mila sar-e-rah ḳhud se jab main ajiib hi apna haal dekha
kisi ki ankhen kisi ka chehra nazar kisi ki kisi ki surat
na puchh mujh se ki main kahan huun mujhe to kuchh bhi pata nahin hai
ki apni surat men aa rahi hai nazar mujhe har kisi ki surat
ye sach hai duniya men aur honge jamil-o-ḳhush-ru hasin-o-dilbar
pasand aa.i magar hamen to janab-e-man aap ki hi surat
na jaane kab se khaḌa tha ‘sarvar’ ik astin-e-umid thame
vo nikla ḳhud se hi ghair-hazir hui ajab haziri ki surat
Leave a Reply