umr-bhar ki talkh bedari ka saman ho gaiin
haae vo raten ki jo khvab-e-pareshan ho gaiin
main fida us chand se chehre pe jis ke nuur se
mere khvabon ki fazaen yusufistan ho gaiin
umr-bhar kam-bakht ko phir niind aa sakti nahin
jis ki ankhon par tiri zulfen pareshan ho gaiin
dil ke pardon men thiin jo jo hasraten parda-nashin
aaj vo ankhon men aansu ban ke uryan ho gaiin
kuchh tujhe bhi hai khabar o sone vaale naaz se
meri raten lut gaiin ninden pareshan ho gaiin
haae vo mayusiyon men meri ummidon ka rang
jo sitaron ki tarah uth uth ke pinhan ho gaiin
bas karo o meri rone vaali ankhon bas karo
ab to apne zulm par vo bhi pasheman ho gaiin
aah vo din jo na aae phir guzar jaane ke baad
haae vo raten ki jo khvab-e-pareshan ho gaiin
gulshan-e-dil men kahan ‘akhtar’ vo rang-e-nau-bahar
arzuen chand kaliyan thiin pareshan ho gaiin
Leave a Reply