rang us mahfil-e-tamkin men jamaya na gaya
ḳhamushi se bhi mira haal sunaya na gaya
vahshat-e-dil ne hijabat-e-jahan chaak kiye
ek parda ruḳh-e-janan se uThaya na gaya
ishq ik daagh sahi daman-e-hasti pe magar
ḳhud mashiyyat se bhi ye daagh miTaya na gaya
kar diya daftar-e-hasti to pareshan dal ne
magar ik ḳhvab-e-pareshan ko bhulaya na gaya
vo andhera tha ki hangam-e-sahar bhi ham se
sham-e-andoh-e-juda.i ko bujhaya na gaya
sarhad-e-ishq se aage na baḌhi vahshat-e-ishq
husn-e-hushyar ko divana banaya na gaya
laakh unvan se bhulana unhen chaha tha ‘ravish’
kisi unvan se magar un ko bhulaya na gaya
Leave a Reply