Ashk Aankhon Mein Jigar Mein Dard Sozish Dil Mein Hai

Poet

ashk ankhon men jigar men dard sozish dil men hai

ik mohabbat ki badaulat ghar ka ghar mushkil men hai

jab na ye duniya thi qaa.em tu hamare dil men tha

jab se ye duniya hai qaa.em tu hamare dil men hai

iztirab-e-tegh-e-maqtal men koi dekhe zara

saaf hota hai guman bijli kaf-e-qatil men hai

aaj un ke jaur ke shikve hain kya kya hashr men

aaj kaisi un ki rusva.i bhari mahfil men hai

naza.a men ai na-muradi us ki tu rahna gavah

jo mire dil ki tamanna thi vo mere dil men hai

qatl ho kar bhi raha qatil se qaa.em vasta

ruuh meri ban ke jauhar ḳhanjar-e-qatil men hai

hoshiyar ai rahrav-e-rah-e-mohabbat hoshiyar

har qadam par jaan ka khaTka tiri manzil men hai

ai ḳhayal-e-tark-e-ulfat qahr hai miT ja.egi

ye jo ik duniya-e-gham abad mere dil men hai

naqs se ḳhali nahin hote hasin bhi ai ‘fahim’

dekh tu su-e-falak dhabba mah-e-kamil men hai