Fareb-E-Yar Ne Chaunka Diya Tha

fareb-e-yar ne chaunka diya tha

hamen to pyaar ne chaunka diya tha

hazaron saal thi us ki riyazat

bas ik inkar ne chaunka diya tha

fasilen ban ga.i thiin chaar janib

ajab asrar ne chaunka diya tha

mohabbat ki hamen fursat nahin thi

jamal-e-yar ne chaunka diya tha

ham apne-ap men gum ja rahe the

kisi guftar ne chaunka diya tha

jo ik aansu baha tha vaqt-e-ruḳhsat

usi iz.har ne chaunka diya tha

bichhaḌte vaqt us ne jo kaha tha

usi iqrar ne chaunka diya tha

vo dast-e-ghaib ban kar aa ga.e the

hamen aghyar ne chaunka diya tha