Jaane Aazad Wo Din Phir Kabhi Aae Ki Nahin

Sohail Azad

jaane ‘azad’ vo din phir kabhi aa.e ki nahin

vo hamen itni mohabbat se bula.e ki nahin

phir main divana banun vo mira daman thame

yaad teri mire yuun naaz uTha.e ki nahin

phir hava taaza na kar de mere bhule hue gham

mujh ko palkon pe tiri yaad biTha.e ki nahin

barha gardish-e-dauran men ulajh kar vo bhi

sochta hai ki mujhe dil se bhula.e ki nahin

yaad kar ishq ke vo daur ki tu ne main ne

dil jala.e ki nahin ḳhvab luTa.e ki nahin

ab ki itvar bhi ‘azad’ na viran guzre

tez barish hai ḳhuda jaane vo aa.e ki nahin