Hasan Abbasi
kabhi jo ankhon ke aa gaya aftab aage
tire tasavvur men ham ne kar li kitab aage
vo ba.ad-e-muddat mila to rone ki aarzu men
nikal ke ankhon se gir paḌe chand ḳhvab aage
dil-o-nazar men hi apne ḳheme laga liye hain
hamen ḳhabar hai ki rasta hai ḳharab aage
nazar ke hairat-kade men kab ka khaḌa hua huun
ik aa.ine men khila hua hai gulab aage
guzarne vaala tha rah-guzar-e-hayat se main
vo ek lamha ki aa ga.e phir janab aage
‘hasan’ jo maazi ka saf.ha ulTa to aa ga.e hain
khajur ke peḌ Tiile aur mahtab aage
Leave a Reply