ḳhushi daman-kashan hai dil asir-e-gham hai barson se
hamari zindagi ka ek hi aalam hai barson se
sitam hai ansuon ka ponchhne vaala nahin koi
hamari aankh bhi tar astin bhi nam hai barson se
vazahat chahta huun tujh se tere is ishare ki
jo paiham meri janib hai magar mub.ham hai barson se
rahe ham saath bhi barson tire kahla.e bhi lekin
tujhe apna na paa.e ye ḳhalish ye gham hai barson se
kisi se mudda.a-e-dil kaha ho to zaban kaT jaa.e
bas ik tu hai jo dil ke raaz ka mahram hai barson se
hamari zindagi kahne ki had tak zindagi hai bas
ye shiraza bhi dekha jaa.e to barham hai barson se
ḳhushi hai ai ‘vaqar’ ab aur na arman-e-ḳhushi baaqi
agar kuchh hai to bas asudgi-e-gham hai barson se
Leave a Reply