Zeeshan Sahil
ghubar dil se nikala nazar ko saaf kiya
phir us ke ba.ad mohabbat ka e’tiraf kiya
jo vo nahin tha to main muttafiq tha logon se
vo mere samne aaya to iḳhtilaf kiya
har ek jurm ki paata raha saza lekin
har ek jurm zamane ka main ne maaf kiya
vo shab guzarne aa.ega mere kuche men
hava-e-sham ne dhire se inkishaf kiya
is anjuman men main aaya tha jin ki marzi se
unhen tumhari nazar se mire ḳhilaf kiya
Leave a Reply