Muneer Saifi
jo bhigi raat to aaseb ke lashkar nikal aa.e
kisi divar se ankhen kisi se sar nikal aa.e
chhuTi jo dhund to kitne hi surat-gar nikal aa.e
ki manzar ke pas-e-manzar ka.i manzar nikal aa.e
sulagti ret phulon ki tarah bistar nikal aa.e
bahut mumkin hai sahra men bhi koi ghar nikal aa.e
ugiin viraniyan kamre men chhat men dar nikal aa.e
miri divangi ke phir se bal-o-par nikal aa.e
ḳhamoshi phail kar jangal ho aur phir shaḳh-e-sargoshi
miri tanha.iyon ki jhiil ke uupar nikal aa.e
khaḌi thiin donon janib niil men paani ki divaren
ki jo ahl-e-asa the beach se ho kar nikal aa.e
jalan yadon ki us ke tan-badan men aisi raushan ho
ki vo barish men kamre se khuli chhat par nikal aa.e
kahin raḳhna zarur ahbab ki sazish men tha ‘saifi’
ki ham phir halqa-e-girdab se bach kar nikal aa.e
Leave a Reply