Syed Sarosh Asif
haqiqat kya bata.un zindagi ki
use lat paḌ ga.i hai aadmi ki
ye ghar men saa.en saa.en sun rahe ho
yahi avaz to hai ḳhamushi ki
mire qadmon men gir kar vaqt roya
suui ulTi ghuma.i jab ghaḌi ki
kabhi bahar jo nikle paanv mere
to ghuTne moḌ kar chadar baḌi ki
mujhe jab DhunDne koi na aaya
to main ne ḳhud hi apni muḳhbiri ki
suna hai qais ne sahra se aa kar
misalen diin miri divangi ki
Leave a Reply