ahmad-shahryar

Nae Zamanon Ki Chap To Sar Pe Aa Khadi Thi

nae zamanon ki chaap to sar pe aa khadi thi

miri samaat guzishta advar men padi thi

udhar diye ka badan hava se tha paara paara

idhar andhere ki aankh men ik kiran gadi thi

falak pe tha atishin darakhton ka ek jangal

aur un darakhton ke biich tarik jhonpadi thi

samai kis tarah meri ankhon ki putliyon men

vo ek hairat jo aine se bahut badi thi

jise piroya tha apne hathon se tere gham ne

sada-e-girya men hichkiyon ki ajab ladi thi

hamari palkon pe raqs karte hue sharare

aur asman men kahin sitaron ki phuljadi thi

tulu sub.h-e-hazar khurshid ki dua par

bujhe charaghon ki raakh daman pe aa padi thi

sabhi ghamin the mire piyale men zahr pa kar

main mutmain tha ki meri takmil ki ghadi thi

saval-e-rukh gulistan men aaya to phuul thahra

labon ki hasrat sukhan men pahunchi to pankhudi thi

ye log to un dinon bhi na-khush the ‘shahryara’

ki jin dinon mere paas jaadu ki ik chhadi thi

More Poems

Leave a Comment