DhunDhti Hai Iztirab-E-Shauq Ki Duniya Mujhe

DhūñDhtī hai iztirāb-e-shauq kī duniyā mujhe

aap ne mahfil se uThvā kar kahāñ rakkhā mujhe

ai nigāh-e-mast is kā naam hai kaif-e-surūr

aaj tū ne dekh kar merī taraf dekhā mujhe

yaar se ho kar judā jaur-e-falak kā ġham nahīñ

ho chukī vo baat thī jis baat kī parvā mujhe

saath bhī chhoḌā to kab jab sab bure din kaT ga.e

zindagī tū ne kahāñ aa kar diyā dhokā mujhe

Leave a Comment