koi bhi saman nahin hai ab meri hairani ko
atish-dan men phenk diya hai ik ḳhat likh kar paani ko
kirdaron ki khep bula kar kya tasvir banaoge
ek kahani se dhanpoge kis kis ki uryani ko
un se puchho jin par guzre lamhe asl qayamat ke
log to hijrat kah dete hain har ik naql-e-makani ko
ham ne jis lamhe saunpe the ḳhvab bilorin ankhon ko
kos rahe hain ab tak ham us lamhe ki nadani ko
jis chashme se paani piina us ka sauda kar dena
ghaddari kahte hain bhaa.i aisi be-imani ko
ghuur raha hai mera dil kab se ik ḳhali pinjre ko
zindan se avaz aati hai aa jaao zindani ko
kaise tanha kamre se uTh kar bazar men aa jaa.en
mushkil se yaad kiya hai ham ne us virani ko
Leave a Reply