Mukhtar Shameem
sub.h rangin-o-javan shaam suhani mange
dil-e-betab ki teri hi kahani mange
koi dekhe ye mira alam-e-jaulani-e-tab.a
jis tarah ab-e-ravan aap ravani mange
ḳhugar-e-aish nahin fitrat-e-shorida-saran
gham-o-andoh-talab soz-e-nihani mange
dasht-e-ghurbat men un ankhon ki nami yaad aa.e
tishna-lab jaise koi sahra se paani mange
shumi-e-zist ki ye aaj zuleḳha ki tarah
kasa-e-umr men lamhat-e-javani mange
apne ḳhvabon pe hai sharminda shab-e-gham-dida
sub.h-e-ma.asum usi shab ki kahani mange
ghuncha-e-shauq ‘shamim’ aaj khila hai shayad
dil-e-vahshat-zada ḳhun-naba-fashani mange
Leave a Reply