shaikh ko kaabe se jo maqsud hai
vo kunisht-e-dil hi men maujud hai
mere jalne ki kisi ko kya khabar
sozish-e-dil atish-e-be-dud hai
ne haram se kaam hai ne dair se
khana-e-dil hi mira masjud hai
farq mat kar ashiq o maashuq men
khud ayaaz aur aap hi mahmud hai
kya pari kya huur kya jinn-o-bashar
sab men vo shayad mira mashhud hai
mashrab-e-ushshaq men ai zahido
us ka jo makhluq hai maabud hai
sang o aahan ko ye karti hai gudaz
aah hai ye naghma-e-da.ud hai
kis se ai ‘joshish’ kahun main dard-e-dil
mere us ke bolna mafqud hai