aina kyuun na duun ki tamasha kahen jise
aisa kahan se laun ki tujh sa kahen jise
hasrat ne la rakha tiri bazm-e-khayal men
gul-dasta-e-nigah suvaida kahen jise
phunka hai kis ne gosh-e-mohabbat men ai khuda
afsun-e-intizar tamanna kahen jise
sar par hujum-e-dard-e-gharibi se Daliye
vo ek musht-e-khak ki sahra kahen jise
hai chashm-e-tar men hasrat-e-didar se nihan
shauq-e-inan gusekhta dariya kahen jise
darkar hai shaguftan-e-gul-ha-e-aish ko
subh-e-bahar pumba-e-mina kahen jise
‘ghalib’ bura na maan jo vaaiz bura kahe
aisa bhi koi hai ki sab achchha kahen jise
ya rab hamen to khvab men bhi mat dikhaiyo
ye mahshar-e-khayal ki duniya kahen jise