Dud-E-Dil Se Hai Ye Tariki Mere Gham-Khana Mein

dud-e-dil se hai ye tariki mire gham-khana men

shama hai ik sozan-e-gum-gashta is kashana men

main huun vo khisht-e-kuhan muddat se is virane men

barson masjid men raha barson raha mai-khana men

main vo kaifi huun ki paani ho to ban jaae sharab

josh-e-kaifiyyat se meri khaak ke paimana men

barq-e-khirman-soz danai hai na-fahmi tiri

varna kya kya lahlahate khet hain har daana men

kis nazakat se hai dekho ittihad-e-husn-o-ishq

zulf vaan shane ne khinchi dard hai yaan shana men

vahshat o na-ashnai masti o beganagi

ya tiri ankhon men dekhi ya tire divana men

ishq ko nashv-o-numa manzur hai kab varna sabz

tukhm-e-ashk-e-shama ho khakistar-e-parvana men

hosh ka daava hai behoshon ko zer-e-asman

khum-nashin misl-e-falatun sab hain is khum-khana men

pattharon men thokaren khata hai nahaq sail-e-ab

puchho kya le jaega aa kar mire gham-khana men

ek patthar pujne ko shaikh-ji kaabe gae

‘zauq’ har but qabil-e-bosa hai is but-khana men

Leave a Comment