nahaq o haq ka unhen khauf-o-khatar kuchh bhi nahin
be-khabar hain vo zamane ki khabar kuchh bhi nahin
dhuum hi dhuum thi madfan ki magar kuchh bhi nahin
khaak is ghar men basar hogi ye ghar kuchh bhi nahin
haae afsos hui kaun si sohbat barkhast
shab ko mearaj men the vaqt-e-sahar kuchh bhi nahin
kah rahi hai ye mare dil se mohabbat us ki
huun to iksir magar mujh men asar kuchh bhi nahin
aa rahi hai ye sada gor ke sannate se
main vo aalam huun jahan sham-o-sahar kuchh bhi nahin
is nazakat se to main kaahe ko bismil hunga
tum chhuri pherte ho mujh ko khabar kuchh bhi nahin
hatif-e-ishq to kahta hai idhar sab kuchh hai
alam-e-yas ye kahta hai udhar kuchh bhi nahin
aankh phir jaati hai mashuqon ki mayuson se
gham-zada kuchh nahin hasrat ki nazar kuchh bhi nahin
turbat-e-qais se kahti hai lipat kar laila
ham tadapte hain pade tum ko khabar kuchh bhi nahin
manzil-e-gor men kya janiye kya guzregi
taaza varid hain abhi ham ko khabar kuchh bhi nahin
lan-tarani ki jo takid hai ai dil ye khula
bab-e-didar men manzur-e-nazar kuchh bhi nahin
khvab dekha tha ki tha vasl ki shab ka saman
jashn tha raat ko hangam-e-sahar kuchh bhi nahin
us ko gahri ise ye ochhi chhuri vaah ai yaar
zakhm-e-dil ghaav hua zakhm-e-jigar kuchh bhi nahin
rishta-e-jan se bhi nazuk hai vo bariki men
gul ki rag phir hai gudaz us ki kamar kuchh bhi nahin
qabr men huron ke aane ka uthaen kya lutf
diida o jism o dil o jaan o jigar kuchh bhi nahin
raas aa jaegi jis ko vo use chahenge
phir mohabbat men sabhi kuchh hai agar kuchh bhi nahin
mutmain huun rah-e-isyan men tiri rahmat se
vo musafir huun ki tashvish-e-safar kuchh bhi nahin
ai ‘sharaf’ hai gul-e-maqsud ke har-su bauchhar
vaah ai khubi-e-qismat ki idhar kuchh bhi nahin
Leave a Reply